Safnahúsið á Ísafirði 100 ára
Þjóðhátíðardaginn 17. júní 2025 verða 100 ár liðin frá því að Safnahúsið á Ísafirði var vígt við hátíðlega athöfn. Var það byggt sem sjúkrahús og þjónaði sem slíkt til ársins 1989. Þann 17. júní 2003 var húsið vígt sem menningarhús eftir miklar endurbætur.
Opið hús í tilefni af 100 ára afmæli Safnahússins á Ísafirði kl. 14.30 – 17.00
Í tilefni af aldarafmæli hússins verður íbúum Ísafjarðarbæjar og öðrum gestum boðið upp á afmælisköku og kaffi auk þess sem tækifæri gefst til skoða alla króka og kima hússins, m.a. barnadeild Bókasafnsins sem opnar þennan dag, fallega endurbætt. Í hinum ýmsu vistaverum verða sýndar gamlar ljósmyndir sem veita innsýn í fyrra hlutverk hússins sem sjúkrahús. Þátttökuverk í myndalottó Listasafns Ísafjarðar verða sýnd á gangi og fimm verðlaunaverk dregin út, eitt úr hverjum aldurshópi, auk þess sem þátttökuverðlaun verða afhent.
Í sýningarsal Listasafns Ísafjarðar opnar Elín Hansdóttir sýninguna BOOK SPACE. Verkið samanstendur af 2000 hvítum bókum sem hafa verið settar upp á almenningsbókasöfnum víðs vegar um Evrópu. Bækurnar má taka að láni í eina viku og nota eins og gestum hentar – þannig hefur safnast upp lifandi samtíma þjóðsaga sem er í stöðugri mótun. Elín býr og starfar í Reykjavík og Berlín. Í verkum sínum – þar sem skúlptúr, ljósmyndun og innsetningar mætast – leggur hún áherslu á líkamlega og skynræna upplifun áhorfandans af rýminu.