Afhentu málverk af Símoni Olsen
Systurnar Kristjana Birna og Martha Lilja Marthensdætur Olsen afhentu í dag, föstudaginn 6. júní, Listasafni Ísafjarðar málverk af afa sínum Símoni Olsen, málað af Halldóri Péturssyni árið 1963.
Símon Olsen var fæddur í Karmöy í Noregi árið 1898 en fluttist til Íslands árið 1924 og settist að á Ísafirði. Hann var hinn mesti atorkumaður og var fyrstur manna til að hefja rækjuveiðar hér við land árið 1935 en slíkum veiðum hafði hann kynnst í Noregi. Stundaði hann rækjuveiðar í Ísafjarðardjúpi á bát sínum Karmöy þar til hann fórst í róðri haustið 1961 ásamt Kristjáni, syni sínum. Símon var kvæntur Magnúsínu Stefánsdóttur Richter og eignuðust þau hjónin fjögur börn, eina dóttur og þrjá syni.