Listamaðurinn sem gleymdist – Vegleg gjöf til Listasafns Ísafjarðar
Listasafn Ísafjarðar lánaði fimm verk úr safneign sinni á sýninguna Endurlit í Listasafni Íslands þar sem sjónum er beint að verkum Kristjáns Helga Magnússonar (1903–1937). Myndir af fleiri verkum í eigu safnsins má finna í bókinni. Rakel Olsen, f.h. ættingja Klöru Helgadóttur, og Einar Falur Ingólfsson færðu Listasafni Ísafjarðar að gjöf 100 eintök af bókinni og fá miklar þakkir fyrir góðan hug og velvild í garð safnsins.
Listamaðurinn sem gleymdist – Vegleg gjöf til Listasafns Ísafjarðar
Þann 23. maí sl. opnaði sýningin Endurlit í Listasafni Íslands þar sem sjónum er beint að verkum Kristjáns Helga Magnússonar (1903–1937), sem lést aðeins 34 ára gamall eftir stuttan en athyglisverðan feril. Samhliða sýningunni kom út yfirgripsmikil bók um ævi og verk Kristjáns, Kristján H. Magnússon - Listamaðurinn sem gleymdist, eftir Einar Fal Ingólfsson. Auk hans skrifa Guðmundur Oddur Magnússon og Dagný Heiðdal greinar í bókina. Að útgáfunni standa ættingjar Klöru Helgadóttur, eiginkonu Kristjáns, í samstarfi við Listasafn Íslands. Listasafn Ísafjarðar lánaði fimm verk úr safneign sinni á sýninguna og myndir af fleiri verkum í eigu safnsins má finna í bókinni. Rakel Olsen, f.h. ættingja Klöru Helgadóttur, og Einar Falur Ingólfsson færðu Listasafni Ísafjarðar að gjöf 100 eintök af bókinni og fá miklar þakkir fyrir góðan hug og velvild í garð safnsins.
Kristján fæddist á Ísafirði 6. mars 1903 og bjó fjölskylda hans í Smiðjugötu 1. Á Ísafirði lagði hann mikilvægan grunn að myndlistarmenntun sinni þar sem Guðmundur Jónsson frá Mosdal kenndi honum teikningu. Kristján fór 17 ára gamall til Bandaríkjanna þar sem hann hóf skömmu síðar listnám við Massachusetts-listaskólann í Boston. Hann var fyrstur íslenskra myndlistarmanna til að setja upp einkasýningar í erlendum stórborgum og fjölluðu stórblöð þar lofsamlega um verk hans. Á Íslandi mætti honum hins vegar andstreymi og þrátt fyrir að vera meðal athyglisverðustu listamanna þjóðarinnar á fyrri hluta 20. aldar hefur lengstum farið hljótt um hann.
Það var ekki fyrr en árið 1986, þegar Listasafn Ísafjarðar hélt yfirlitssýningu á verkum Kristjáns Helga, að farið var að endurmeta stöðu hans í íslenskri myndlist. Jón Sigurpálsson, þáverandi forstöðumaður safnsins, taldi Kristján vanmetinn listamann, m.a. vegna þess að hann hafði „framið þann glæp“ að nema málaralist í Ameríku, sem á þeim tíma þótti ekki viðurkenndur vettvangur listnáms. Var Jóni mikið í mun að Kristján Helgi hlyti réttmætan og verðskuldaðan sess í íslenskri listasögu þar sem hann hafði fram að því alfarið verið hunsaður.
Listasafn Ísafjarðar hefur frá þeim tíma lagt sig fram um að eignast verk eftir Kristján og á nú fjórtán verk eftir hann. Fimm þeirra gaf sonur listamannsins, Magnús H. Kristjánsson. Þar á meðal eru portrettmálverk af Kristjáni og eiginkonu hans, Klöru Helgadóttur. Gjöfinni fylgdi það skilyrði að þessi tvö verk yrðu alltaf sýnd saman og hafa þau nú um árabil tekið á móti gestum í bogaherbergi Safnahússins á annarri hæð. Þess má einnig geta að fyrsta verkið sem Listasafn Ísafjarðar eignaðist þegar það var stofnað 12. febrúar 1963 var olíumálverk eftir Kristján, Úr Skutulsfirði, stofngjöf frá Byggðasafni Vestfjarða, úr dánarbúi Guðmundar Jónssonar frá Mosdal.
Bókin Kristján H. Magnússon - Listamaðurinn sem gleymdist verður til sölu hjá Listasafni Ísafjarðar og munu tekjur af sölu hennar renna til kaupa á verkum fyrir safnið. Verð bókarinnar er 20.000 kr. og geta áhugasamir haft samband með því að senda póst á netfangið listasafn@isafjordur.is eða senda skilaboð á Facebook-síðu safnsins.