Kristján H. Magnússon - Fyrirlestur
Nýlega kom út bók um ævi og feril ísfirska listamannsins Kristjáns H. Magnússonar – Listamaðurinn sem gleymdist. Einar Falur Ingólfsson, aðalhöfundur og ritstjóri bókarinnar, mun fjalla um Kristján og verk hans í fyrirlestri í Safnahúsinu miðvikudaginn 13. maí kl.17.00.
Fyrirlestur um ævi og feril Kristjáns H. Magnússonar
Kristján Helgi Magnússon fæddist á Ísafirði árið 1903 og lést aðeins 34 ára gamall, árið 1937. Ferill hans var á ýmsan hátt einstakur í íslenskri listasögu. Kristján lærði list sína vestanhafs, í Boston og New York, og vakti strax athygli á námsárunum fyrir mikla hæfileika. Eftir námið hugðist hann skapa sér nafn í Bandaríkjunum en örlögin höguðu því svo að 26 ára gamall kom hann til Ísafjarðar í leyfi og snéri ekki aftur. Hann gekk að eiga gamla vinkonu frá Ísafirði, Klöru Helgadóttur, og tók að mála íslenskt landslag að miklu kappi; ekki síst vöktu vetrarmyndir hans athygli í byrjun en hann var fyrstur íslenskra listamanna til að mála markvist myndir úti í náttúrunni á veturna. Kristján sýndi verk sín líka ört og honum dugði ekki heimamarkaðurinn; hann var fyrstur íslenskra listamanna til að setja upp einkasýningar í erlendum stórborgum og fengu verkin alltaf góða dóma. Hér heima voru skoðanir þó skiptar; flestir gagnrýnendur hömpuðu verkum Kristjáns og þau seldust vel, en rýnir Morgunblaðsins fannst þeim þó flest til foráttu og spunnust miklar deilur um þau.
Eftir ótímabært andlát Kristjáns Helga fennti furðu fljótt í spor hans og verk hans hafa lítið sést opinberlega, nema þá helst á vegum Listasafns Ísafjarðar sem hefur haldið minningu hans á lofti. Með þessari veglegu bók er saga hans rifjuð upp og er nú öllum aðgengileg, svo erfitt verður hér eftir að ganga fram hjá brautryðjandi verkum hans.