SKIPIN HANS INGA BJÖSSA
Bæjarlistamaðurinn Ingvar Friðbjörn Sveinsson opnar sýningu á verkum sínum mánudaginn 1. júní kl. 16:00 í Safnahúsinu á Ísafirði. Sýningin er hluti af dagskrá í tilefni af 30 ára afmæli Ísafjarðarbæjar.
Brú á milli fortíðar og nútíðar
Í verkum sínum hefur Ingi Bjössi skapað nákvæm og einstök líkön af skipum og togurum sem bera með sér sögu sjávarútvegs, mannlífs og menningar við strendur Vestfjarða.
Með þolinmæði, natni og listrænni sýn vinnur hann hvert smáatriði af alúð. Frumlegt efnisval og handverk kalla fram sterka tengingu við fortíðina og varpa ljósi á þá arfleifð og sögu sem skipin geyma.
Líkönin mynda brú milli fortíðar og nútíðar þar sem minningar, sjósókn og daglegt líf fyrri tíma fá nýtt form. Í verkunum sameinast handverk, rannsókn og listsköpun á persónulegan og áhrifaríkan hátt.
Sýningin veitir innsýn í heim þar sem virðing fyrir sögu og næm tilfinning fyrir efniviðnum fá að njóta sín og minna á mikilvægi þess að varðveita sögur samfélagsins.