Förufólk í Laugarnesi og á Ísafirði
Árið 1926 kom fjölskylda til Íslands frá Danmörku með vísi að dýragarði meðferðis. Þau komu sér fyrir í Laugarnesinu og síðar inni við Elliðaár. Næstu misserin átti fólkið eftir að vekja nokkra athygli Reykvíkinga og raunar víðar um landið – til að mynda lá leiðin til Ísafjarðar.
Stefán Pálsson sagnfræðingu verður með erindi í Safnahúsinu fimmtudaginn 3. september kl. 16.30 þar sem hann segir frá óvenjulegum gestum sem dvöldu á Íslandi á 3. áratug 20. aldar.
Helstu heimildir eru afar brotakenndar smáfregnir í dagblöðum – raunar furðu fáar miðað við hversu óvenjulegir gestir voru á ferðinni og fáein bréf milli opinberra aðila sem töldu sig þurfa að hafa afskipti af starfsemi á þeirra vegum. Því var slegið föstu að um sígauna væri að ræða en hafa ber í huga að vitneskja landsmanna um Roma-fólk var lítil sem engin og öll hugtakanotkun mjög á reiki. Hvernig stóð á ferðum fjölskyldu þessarar til Íslands? Hvaða upplýsingar - ef nokkrar - er unnt að finna um fólkið? Stefán Pálsson hefur sökkt sér ofan í þessa skringilegu sögu og með tímanum hefur sífellt meira komið í leitirnar. Öllum sem hlýða vilja er boðið að mæta að hlusta á erindið, sem tekur um 45 mínútur.
Stefán Pálsson er sjálfstætt starfandi sagnfræðingur og varaborgarfulltrúi. Hann hefur samið nokkrar bækur um sagnfræðileg málefni auk annars.