Um ljósmyndasafnið

MARKMIÐ safnsins er að safna, skrá og varðveita ljósmyndaefni, svo sem ljósmyndir, glerplötur, filmur og skyggnur, sem og önnur gögn og skjöl sem tengjast greininni og hafa menningarsögulegt gildi fyrir héraðið. Við rekstur safnsins er lögð áhersla á að varðveisla mynda, filma og annarra gagna sé eins og best verður á kosið. Ennfremur að veita aðgang að þeim á safninu eða með stafrænum hætti á vefnum. Safnið tekur við og varðveitir efni frá fyrirtækjum, stofnunum og einkaaðilum, sé þess óskað.

SAFNIРer í eigu Ísafjarðarbæjar, bæjarráð Ísafjarðar fer með yfirstjórn safnsins, sem er að öðru leyti í höndum forstöðumanns. Safnið starfaði sem deild í héraðsskjalasafninu frá 1970, en hefur verið sjálfstæð stofnun frá flutningi þess í nýtt húsnæði í safnahúsinu 2003 og starfar samkvæmt Samþykkt fyrir Ljósmyndasafnið Ísafirði frá 2003. Safnið starfar samkvæmt lögum um söfn, um höfundarrétt og lögum um meðferð menningarverðmæta.

 

SAFNKOSTUR er um 500.000 ljósmyndir á glerplötum, filmum og pappír auk stafrænna mynda. Meginhluti safnsins eru myndir og filmur frá ljósmyndurum er starfað hafa á Ísafirði allt frá 1889, m.a. Ljósmyndastofu Björns Pálssonar, Ljósmyndastofu M. Simson, Ljósmyndastofu Jóns Aðalbjarnar Bjarnasonar, Arnþrúðar Aspelund, Ljósmyndastofu Ísafjarðar og Ljósmyndastofu Leós Jóhannssonar. Einnig eru í safninu ljósmyndir frá Vestfirska fréttablaðinu, auk myndasafna frá einstaklingum.

Í tilefni af flutningi safnanna (bóka-, skjala-, ljósmynda- og listasafns) í ný húsakynni árið 2003 var safninu afhent filmusafn Jóns Hermannssonar, loftskeytamanns á Ísafirði, um 10.000 myndir aðallega atvinnulífsmyndir frá 3ja aldarfjórðungi 20. aldar. Í safninu er einnig varðveitt söfn Sigurgeirs B. Halldórssonar, um 1.000 myndir frá miðri 20. öld, Hauks Sigurðssonar ljósmyndara (um 24.000 myndir) og frá ljósmyndastofunni Myndás um 40.000 myndir. Árið 2007 bárust safninu 76.000 myndir frá Þorsteini J. Tómassyni á Ísafirði og árið 2009 var allt filmusafn héraðsfréttablaðsins Bæjarins besta afhent.